📘 Aktivitet me nxënësit e klasave të VI

Tema: Si të arrijmë sa më shumë sukses 

Gjatë aktivitetit u diskutuan pyetje që shpesh i bëjnë vetes nxënësit:

- “Mësoj nga disa orë në ditë, por nuk mora notë të mirë?”

- “Sa kohë duhet të mësoj brenda ditës që të marr notë të mirë?”

- “A thua nxënësit me sukses të mirë mësojnë më gjatë se ata me sukses më të dobët?”

Psikologia shpjegoi se përgjigjet për këto pyetje ekzistojnë dhe janë shumë të thjeshta:

Çdo nxënës mund të mësojë për të mësuar. Gjegjësisht nxënësit me sukses më të mirë, nuk mësojnë më gjatë kohë, se sa nxënësit me sukses më të dobët.Ata më mirë e shfrytëzojnë kohën për mësim, mësojnë sistematikisht në mënyrë të organizuar dhe të planifikuar. Ata kanë plan se çka?, kur? dhe si duhet? të mësojnë.

🔹Në fund të aktivitetit, nxënësve pjesëmarrës iu shpërndanë broshura udhëzuese mbi mënyrat e duhura të të mësuarit.

Falenderojmë psikologen e shkollës Shpresa Qamili dhe sociologen Fitore Misimi, për këtë aktivitet të rëndësishëm për nxënësit tanë.

Në kuadër të lëndës Inovacion për klasat e nënta, u realizua një vizitë edukative në një ndërmarrje me nxënësit e shkollës qendrore dhe periferike. U vizitua ndërmarrja "Fenik Kompani", e drejtuar nga zotëri Femi Idrizi dhe zonja Kadime Idrizi, nga fshati Pallçisht. Kjo vizitë ishte një mundësi e mirë për nxënësit që të njihen më nga afër me punën, përkushtimin dhe inovacionin në një biznes, si dhe të marrin njohuri praktike që lidhen me lëndën. Falenderojmë arsimtaren Arta Aliti për kontributin e dhënë, si dhe arsimtaren Luljeta Mamuti dhe bashkëpunëtorët profesionalë për mbështetjen dhe angazhimin e tyre!

Me respekt,

Drejtoresha e shkollës

Zenihate Memeti

Nxënësit e klasës V-1, së bashku me arsimtaren Teuta Ramadani zhvilluan një aktivitet kreativ ku ngjyrosën pamje të natyrës së pastër dhe zbukuruan dritaret e klasës me motive plot ngjyra e gjallëri. 🎨🌸

Ky aktivitet synon të nxjerrë në pah dashurinë për natyrën dhe rëndësinë e ruajtjes së saj.

Pamjet e punuara reflektojnë një mjedis të pastër, të gjelbër dhe plot jetë! 

📚🌿 Aktivitet për stinën e vjeshtës 🍂

Nxënësit e klasës IV-1 dhe IV-2, nën udhëheqjen e arsimtares Lejla Murseli dhe arsimtarit Misim Misimi zhvilluan një aktivitet të bukur me temë: “Shijet e vjeshtës në duart e nxënësve tanë”.

Me plot kreativitet dhe gëzim, ata sollën begatitë që na dhuron vjeshta dhe përgatitën turshi të ndryshme. 

Ky aktivitet u ndihmoi nxënësve të mësojnë mbi zakonet tradicionale të përgatitjes së ushqimeve për dimër.

 

 

Sot, nxënëses së shkollës sonë Aldina Ajrullai iu nda lëvdata për krijimtarinë e saj letrare, në konkursin e organizuar nga Biblioteka “Koço Racin”, me rastin e 23 Prillit – Ditës Botërore të Librit dhe të Drejtës së Autorit.

🔸Një falënderim i veçantë për arsimtaren mentore Fatbardha Asani për angazhimin dhe mbështetjen e vazhdueshme!

 

08 Maj 1995 – 2025 | 30 vite Shkolla Fillore Komunale “Dervish Cara” – Pallçisht

Sot, me emocion dhe krenari të veçantë, shënuam 30-vjetorin e themelimit të Shkollës Fillore Komunale “Dervish Cara” – një udhëtim i gjatë i mbushur me përkushtim, sfida dhe arritje që kanë lënë gjurmë të pashlyeshme në jetën e shumë gjeneratave të nxënësve dhe mësuesve tanë.

Kjo ditë e paharruar na mblodhi së bashku – nxënës, mësimdhënës, prindër, përfaqësues institucional, drejtor të shkollave, drejtues lokalë, imamë dhe miq të shumtë të shkollës, të cilët ndanë me ne këtë përvjetor të rëndësishëm.

Nxënësit tanë u shprehën përmes një programi të pasur kulturor-artistik, të përgatitur me dashuri dhe përkushtim nga mësuesit tanë, ku u shfaqën këngë, valle, poezi e recitime që pasqyruan dashurinë dhe lidhjen e fortë me shkollën tonë. Po ashtu, u hap një ekspozitë mbresëlënëse me vizatime, punime artistike dhe projekte kreative që pasqyrojnë talentin, përkushtimin dhe punën e palodhur gjatë gjithë vitit shkollor

Urime 30-vjetori i Shkollës sonë! Le ta ndërtojmë së bashku të ardhmen e dijes me dashuri, përkushtim dhe bashkëpunim të ndërsjellë!

Me respekt,

Drejtoresha

Zenihate Memeti

 

Sot, në shkollën periferike në fshatin Kallnik, u mbajt një ekspozitë e veçantë me rastin e Ditës së Shkollës!

Në mes të atmosferës festive dhe buzëqeshjeve të nxënësve, u prezantuan punime kreative, vizatime,ide dhe plot ngjyra që treguan përkushtimin dhe talentin e tyre.

▫️Faleminderit çdo nxënësi dhe mësuesi që e bëri këtë ditë kaq të veçantë!

Urime për Ditën e Shkollës – krenarë për çdo hap drejt dijes dhe zhvillimit!

 

Dita e Ekologjisë

“Një mjedis i pastër, një jetë e shëndetshme”

Sot, me aktivitete të ndryshme dhe me shumë dashuri për natyrën, nxënësit e shkollës sonë shënuan Ditën e Ekologjisë. Nën udhëheqjen e arsimtarëve, ata morën pjesë në një aksion ekologjik dhe mbollën lule, duke dhuruar ngjyra dhe jetë ambientit tonë.

Ky aktivitet është realizuar në shkollën qendrore dhe periferike “Dervish Cara” me qëllim që të rrisim ndërgjegjësimin për rëndësinë e mbrojtjes së mjedisit dhe të kujdesemi për natyrën kudo që jetojmë.

Gjithashtu, falënderojmë përzemërsisht arsimtarët dhe prindërit që me përkushtim dhe gatishmëri kontribuojnë vazhdimisht për të mirën e shkollës sonë.

Le ta mbajmë natyrën të pastër, për një të ardhme më të gjelbërt.